abutem, wen, ti pammadso a ritual kadagiti anniniwan
a salsallakuban: agsalsala a bur-i ti sumsumgar--
pusisaw a segged ti kandela a kemmegen ti angin.
ket alun-onen ti agbisngay nga agus ti maigamer a ngatangatam!

kumay-ot ta kumay-ot ta balaibim iti kanabsuok ('maykan, Ronnel,
dika agbatbati) ti agtuklatuklaw nga al-alia ti buntiek ken ti tilapia
a mensahero ti buteng (ania't ibuniagko kadagiti litem ti nagbalay
a dara ti ranggas?) awanan nagan dagiti naidasay nga asug
ken nayatang a leddaang.

makitam manen ti atong a naaronan ken pinaginuduan (ken pagtunuan
pay iti butiti!) ti maag ken gamrud a negosiante iti pormalin,
di ngata seknan sulit nga aguray iti sabali pay nga ilado
a mapreserba a bangkay dagiti maimansayag nga isem dagiti arapaap?

gaudam pay, wen, ta balsam a lungon (diakon kaya, sir!)
ta iti ungto ti linibegda ken libegenda pay a karayan, nagatang
ti sutil a kulalanti iti anestisia, bareng kad laeng makapedped
nga indieksion dagiti agkudaap a nakem dagiti ay-ayatem.

mabibiak, ta di agrupsa ti bumangon nga isem puniebre (kukuakton
ti lungon!) kiburennak ti litania ti nalmes nga angaw ti am-amangaw
dumuri ti siplag ti agnunog a panangay-ay, ket bay-am
a gilingen hustisia ti umel a dung-aw, ket iti sakaanam: adtoy,
itugkelko ti imortal a krus ken ti lapida a nakaikitikitan
ti natay a dara ti linallalim nga arapaap.