|
Kitingkiting
O Apomi a Kitingkiting krus nga agbibitin. --Iluko nga orasion Anian a kinadagsen! O Apomi A Kitingkitng, kabagis, kabsat. Nabantot dagiti bangungot Iti nargaan a turog Dagiti gumawgawwawa nga ungot Kitaem: Aglabay pay koma Ti nabisinan a karkarma Dagiti sarindaniw ken sariugma `Di pimmusayen a lagip. (Nagpasiar isuna Iti nabannogen nga uma. Iti bakir dagiti nakamada A kari dagiti nangisit nga ulep Iti agrekkarekkangen a kinelleng Dagiti agkatangkatang a derrep.) Ngem anian, O Apomi a Kitingkiting, Naitanin dagiti bang-i! Ikallaysanto kano dagiti rawet Iti sekreto a simbaan dagiti himmigante Nga ansisit! Ken wen, kabsat, kabagis, Dios Apo a Kitingkiting, iti kursada Dagiti legal a kari ken sapata ti palasio, Makitam ita dagiti dadaulotayo, Agkumulgarda iti immiptip nga ostia Ti puraw a demokrasia ti pimmurawen A kamara dagiti bampira, presidensia Dagiti tur-og nga aningaas Dagiti dingraw ti nailian a burburtia. Ket dagiti madaydayaw a bampira, Nakabarongda, O Apomi a Kitingkiting! Mangngablonda itan, partera ti suni A panagdadagsen! Marnekda pay laeng iti kadkadua ken kaporete. Mabisinda pay laeng iti nalabaga a dara. Binutilion a dara, kabagis, kabsat, O Apomi a Kitingkiting! O Apomi a Kitingkiting, kabagis, kabsat, Isalakannakam kadi Kadagiti pimmurawen a mangisalakan. 
TI AUTOR: Propesor iti literatura ken pilosopia iti University of the Philippines ni Aurelio S. Agcaoili, nayanak iti Siudad ti Laoag, ken maysa kadagiti nangbangon ken agdama a presidente iti Integrated Creative Resources Institute Writers Cooperative a buklen dagiti agtutubo/agkabannuag a mannurat nga Ilokano. Maysa a premiado a mannaniw, fictionist, essayist, novelist, ken literary critic. Adun a pammadayaw ti naawatna kadagiti pasalip iti literatura Ilokana a pakairamanan ti Cultural Center of the Philippines Literary grant para iti daniw-Iluko idi 1992, umuna a gunggona iti salip iti daniw ti Bannawag idi 1995, ken maikadua a gunggona iti Carlos Palanca Memorial Awards for Literature iti Sarita nga Iluko idi 1997. Madama a sursuratenna ti nobelana a Dangadang babaen ti Belmonte Grant ti UP. Maikadua daytoy iti uppat a nobela iti proyektona a Kailokuan Quartet. Ti Bannuar, a naisurat iti Filipino, ti umuna a nobelana. Nayalnag itay nabiit dagiti librona a Derrep iti Panawen ti Dangadang, ken Rugso iti Panawen ti Risiris, agpada a koleksion ti dandaniw.
|
