|
Nadumaduma a parnuay-nakem dagiti nagsukimat iti nagduduma a panawen ADTOY) ti agsuksukimat, agsalsaludsod: aniaak? no agbasaak, tikawennak ti nakemko; diak met denggen (ti nasukimat kunana: awan biangko iti sirib; ti ammok: siak ti ari, diak talken) ti Sinukimatda kunkunana: ah, tao nga agsuksukimat, sika nga agayat iti sirib, tikawennaka ti nakemmo iti lubong a nasukimat, Diak patien: Diak insuro (ti teolohia, pilosopia, siensa ken literatura - ni camus: mito ni sisyphus? being and nothingness ni sartre? existenz dasein ni jaspers? predestinasion ni calvin? misterio ti pannakaadda ni marcel? absurdo-teolohikal ni kierkegaard? enveiling being ni heidegger? ken adu pay a parnuay-nakem...) wen (siasinoman nga agsukimat wenno mangtukod iti sirib ken nakem, ammuenda koma daytoy: awan pudno ditoy a lubong, Ta:ti TAO nga agsukimat iti LUBONG a masukimat-pagsukimatan, aramid ti DIOS a di masukimat ti nakem; wen, ti sinukimatda: ti amin...)TI BANAG TI PANAGSUKIMAT ITI NAUNDAY A PANAWEN: ? Bassit a kaikarian I never saw the moor, I never saw the sea; Yet know I the heather looks, And what a wave must be." Chartless by Emily Dickinson pegpeg ngamin ti kayarigak, awan, awanan kaimudingan dita pagarian ti pannakaawat... awan makitak a pannakabalin, wenno bileg ti kinataok tapno agpagus nga agari (uray awan mangitan-ok) ngem, ala, inton agulimek dagiti riari ken dinton mangngeg ti palayupoy ti angin, maammuamto a siak ti napukaw a daniw ti kinasiasinom... 
TI AUTOR: Nayanak ni John B. Buhay idi Enero 11, 1970 iti Bansing, Bayombong, Nueva Vizcaya. Tinurposna ti Christian Education idi 1990 iti Eveland Junior College idiay San Mateo, Isabela. Idi 1992, lineppasna ti Bachelor of Ministry iti Union Theological Seminary iti Cavite. Napalpasna pay ti Bachelor of Arts Major in Literature iti Aldersgate College iti Solano, Nueva Vizcaya. Sigud nga ordenado a Pastor iti United Methodist Church, agtaltalon ken agbangbangkag iti agdama. Isu ti agdama a presidente ti GUMIL Nueva Vizcaya. Adun a sarita, daniw, ken salaysayna ti naipablaak iti Bannawag ken dadduma pay a publikasion. Nagsursurat pay iti script iti drama iti radio ken iti komiks. Adu metten a gunggona ti inyalatna kadagiti nadumaduma a pasalip iti panagsuratan iti Literatura Iluko a pakairamanan ti Umuna a Gunggona iti umuna a Salip iti Avant Garde a Daniw nga Iluko idi 1995 babaen ti daniwna a "Nadumaduma a parnuay-nakem dagiti nagsukimat iti nagduduma a panawen." Isu ti maysa kadagiti Fellow iti Daniw iti 1997 University of the Philippines National Writers Workshop a naangay idiay Baguio City. Addaanen iti bukod a pamilia ket addan maysa a bungada ken ni Emily a kaingungotna.
|
