|
Maymaysa laeng, kayumanggi
ah, maymaysa laeng, kayumanggi ti idi a pannakapisang singin a lawas a kawayan, genesis ti puot ken kararua, utangmo a di likudan ti burayok ti pigsa ken ingel a kupikop ni patneng... nagramutka iti ngudo ti sippit duogan a tumatayab isut' nanganak-namuniag iti puli a kinuyog ti amian... putedputed ti linas a tinalaytaymo, tunggal puted rubuatam iti ladawan singin a higante, agay-ayam iti kadaratan nagtawidam iti kidser isip-parmata dinegdegan saplit nakaipadpadam a daga; uray addakan iti ita ket di madeppan ti punganay a kawayan, ingungotem ti bugtong a genesis, ti bin-im tuntonenda lakay a padto aginggat' rikep ti bugbugtong met nga apokalipsis! 
TI AUTOR: Naipasngay ni Joel B. Manuel idi Oktubre 18, 1969 iti Balioeg, Banna, Ilocos Norte. Tinurposna ti kinamaestro iti Mariano Marcos State University College of Education iti Laoag City ket iti agdama, mangisursuro iti Physics ken English iti Caribquib High School iti ilida. Nasapa a timmaud ti essemna iti panagsuratan. Nakaipablaaken kadagiti salaysay idi adda iti haiskul. Nagab-abak kadagiti press conference iti probinsial ken rehional nga agpang. Maysa a premiado a mannurat, adun ti pammadayaw a naawatna kadagiti nadumaduma a pasalip iti panagsuratan iti Literatura nga Iluko. Adu metten a daniw, sarita ken salaysayna ti naipablaak iti Bannawag ken dadduma pay a publikasion. Naipabuya payen kadagiti piesta ken okasion ti eskuela ken barangay dagiti putarna a makaray-aw a drama iti entablado. Isu ti maysa kadagiti Fellow iti Ababa a Sarita iti 1998 University of the Philippines National Writers Workshop a maangay idiay Baguio itoy a kalgaw. Baro pay.
|
