|
Adda kenka ti sabong?
I. DADAPILAN iti dakulap ti siglo nainaw ti reporma a bunga ti irurupir tanikala ti tirtiris naitagbat tadem ti pannubok naisubo ti biag a rim-iten gantil realidad nagtedted ling-et ken dara iti kasayugan ames dadapilan ideolohia... ginuyod nuang ti singkaw nagtayyek ngipen dua a bileg nagbuya ti sangaili a ganggannaet... II. BENNAL naisaang ti bennal a dung-aw... iti karaang batibat naisungrod anges ti gatilio nailimog ti lua iti alingget... nagkanta ti agpagunggan a buli... napasag ti namnama ngem nagungar kired ti prinsipio a nasindian iti apuy... gimmayebgeb iti barukong ti agtangkayag a bileg rebolusion... III. SINUBLAN agsebba dagiti simotsimot iti entablado ti sinublan sakaenda iti nabiag a dara ti narames a kalintegan a mitsa ti nagkubuar a pangta... nagallangogan kadagiti kalsada ken uray iti bambantay ti arimpadek dagiti naabel nga am-ammangaw... nakiwar ti talinaay iti puso... iti rikna... iti panunot... IV. TAGAPULOT naluto ti historia a kayumanggi... naidasar ti lunod a taraon... nagiinnagaw dagiti agbibisin a didiosen a nagsilamut... nagkuripaspasda iti napait nga allilaw ti tagapulot a sabidong... immisem dagiti kosinero a ganggannaet... V. BALU iti dadapilan a marim-it ti unas... agkuripaspas ti anges agtedted bennal a dara iti sinublan lunod maluto ti sabidong a tagapulot a maadaw iti agbugbugsot a kaputotan... ngem kurang kadi ti maidaton a balu a pangsaka iti langit a gura ti nasugat a prinsipio ti ideolohia a pagnguduan damsak layus a dara? nadamka unayen ti risiris a puon nagbagtitan ti kalapati a nakatugaw iti krus a trono ken siit a korona ti dadapilan... agingga ita sapsapulek ti napukaw nga ammalna a sabong... 
TI AUTOR: Ni Daniel L. Nisperos ket naipasngay iti San Lorenzo, San Nicolas, Ilocos Norte idi Hulio 21, 1969. Inrugina ti BS Electrical Engineering iti Mariano Marcos State University iti Batac, Ilocos Norte ngem immakar iti MMSU Institute of Technology iti Siudad ti Laoag a nagadalanna iti BS Industrial Technology. Nagpaay kas Marketing Manager sa Production/Technical Manager ti Integrated Creative Resources Institute (ICRI) kabayatan ti panagpaayna pay kas layout artist ti Kailokuan Star Weekly a publikasion ti ICRI. Agpapay ita kas paste-up artist ti Bannawag Magazine. Adun ti naipablaakna a daniw, sarita ken salaysay nga Iluko iti nadumaduma a publikasion. Adu metten a premio ti inawatna manipud kadagiti nadumaduma a pasalip iti panagsuratan iti Literatura Iluko. Napili kas maysa a Writing Fellow iti Daniw iti 1996 University of the Philippines National Writers Workshop a naangay iti Baguio City. Baro pay.
|
