|
Salsaludsod
Kasano a batoken Ti lansad ni laing Iti gumawgawwawa Nga ungot Iti templo Ti nagkapuyon Nga ima Ti nabartek A dios? Ania a daniw Ti adda iti maskara Dagiti naikitikit A lulua ti diosa Dagiti nakapakleb A kuribot? Ania a saguday Ti ikut dagiti ramay, Agdardarepdep Kadagiti panagani Iti itta a mula Dagiti mannamay? Ania a barengbareng Ti adda kadagiti igao, Gura dagiti pul-oy Iti naikamada a rag-o Dagiti nalinay A sao? Mano pay a bisin Ti tawar ti kaasi Iti aklo A di makagao? Mano a kinasinsinan Dagiti beggang Ti mangaron iti darepdep Kadagiti pannakapnek A pannangan? Mano pay a kari Ti presidente dagiti walang Ti kasukat Dagiti nailian a paidam? Awan, awan kadi lattan Pangrabii iti nagawangan A latat' biskuit, A benditado a pagbagasan? 
TI AUTOR: Propesor iti literatura ken pilosopia iti University of the Philippines ni Aurelio S. Agcaoili, nayanak iti Siudad ti Laoag, ken maysa kadagiti nangbangon ken agdama a presidente iti Integrated Creative Resources Institute Writers Cooperative a buklen dagiti agtutubo/agkabannuag a mannurat nga Ilokano. Maysa a premiado a mannaniw, fictionist, essayist, novelist, ken literary critic. Adun a pammadayaw ti naawatna kadagiti pasalip iti literatura Ilokana a pakairamanan ti Cultural Center of the Philippines Literary grant para iti daniw-Iluko idi 1992, umuna a gunggona iti salip iti daniw ti Bannawag idi 1995, ken maikadua a gunggona iti Carlos Palanca Memorial Awards for Literature iti Sarita nga Iluko idi 1997. Madama a sursuratenna ti nobelana a Dangadang babaen ti Belmonte Grant ti UP. Maikadua daytoy iti uppat a nobela iti proyektona a Kailokuan Quartet. Ti Bannuar, a naisurat iti Filipino, ti umuna a nobelana. Mayalnag met iti mabiit ti librona a Derrep iti Panawen ti Dangadang, ti umuna a libro iti serye dagiti koleksion ti dandaniwna. Sumaruno a mairuar ti dua pay a libro iti nasao a serye: ti Rugso iti Panawen ti Risiris ken ti Gerra iti Panawen ti Ginnasanggasat.
|
