Manong Celing & Manang Poly Darudar kadi pay laeng iti lusod dita Hawaii, Pagkampuan dagiti ubbing iti gubgubatda? Bugtakenyo kadi dagiti buteng a daton ni lang-ay, Itan ta awanen dagiti alualud dagiti kaasi Iti Kauai? Imbatim, Manong Celing, dagiti paripirip Dagiti ginggined, partuat dagiti ibit Dagidi ubbing a bagiw a kumarinio Kadagiti sabong ti salamagi wenno unas A takawen dagiti berde a darepdep Dagiti malislisayan. Agkallong latta ti kararua. Kallongenna dagiti ayat iti imbatiyo a lagip. Uray ti kinaawan, adda latta `di isem ni Manang Poly Iti panangyayabna iti naladaw a pannangan. Kasano koma a malipatak dagiti bugawbugaw A guardia daydi ullaw, insingdanko daytoy Iti pul-oy-amianan ngem intayyek dagiti lugan-angin A nangyadayo kadakayo ita ditoy sibay? Agapon dagiti kaibaan sagpaminsan Kadagiti bandehado a maaw-awangan. Malagipyo kadi, Manong Celing ken Manang Poly, Malagipyo kadi daydi tangguyob `di ubing, Daydi garaigi nga uni a pangbugtak iti buteng Iti ilalabas dagiti sangkabagi Iti panteon dagiti saning-i a pitak, saan, Lubnak gayam, pagupran iti kinaasino, Pangilemmengan met iti ulila a dungngo Dagiti lagip a kas kadakayo? Ti rinamesda nga ubing unay a malem, Agungarto latta daytoy. Bumangonto latta Iti kamposanto dagiti naunday a sipnget, Taeng dagiti nakaturog metten a balunet. Nagaponen dagiti garakgak, ragsak kadagiti lulua No maamirisko a dikayonton agsubli iti pitak. Pagpupurokanyo no kua dagiti darudar iti Santa Maria. Ngem adayo unayen ti Kauai, wenno Maui, Wenno Waipahu. Uray no kasta, puyotakto latta Ti tangguyob iti sarusar ni allaalla. Masapul ngamin a maay-ayo latta dagiti pul-oy Ken ti bulan a hawayano tapno agumbi ti dayyeng. Umanayen dagitoy a pangkugit Iti supot a ngatangata iti nakem. TI AUTOR: Propesor iti literatura ken pilosopia iti University of the Philippines ni Aurelio S. Agcaoili, nayanak iti Siudad ti Laoag, ken maysa kadagiti nangbangon ken agdama a presidente iti Integrated Creative Resources Institute Writers Cooperative a buklen dagiti agtutubo/agkabannuag a mannurat nga Ilokano. Maysa a premiado a mannaniw, fictionist, essayist, novelist, ken literary critic. Adun a pammadayaw ti naawatna kadagiti pasalip iti literatura Ilokana a pakairamanan ti Cultural Center of the Philippines Literary grant para iti daniw-Iluko idi 1992, umuna a gunggona iti salip iti daniw ti Bannawag idi 1995, ken maikadua a gunggona iti Carlos Palanca Memorial Awards for Literature iti Sarita nga Iluko idi 1997. Madama a sursuratenna ti nobelana a Dangadang babaen ti Belmonte Grant ti UP. Maikadua daytoy iti uppat a nobela iti proyektona a Kailokuan Quartet. Ti Bannuar, a naisurat iti Filipino, ti umuna a nobelana. Mayalnag met iti mabiit ti librona a Derrep iti Panawen ti Dangadang, ti umuna a libro iti serye dagiti koleksion ti dandaniwna. Sumaruno a mairuar ti dua pay a libro iti nasao a serye: ti Rugso iti Panawen ti Risiris ken ti Gerra iti Panawen ti Ginnasanggasat. |