Ayatko Ikutam
ni Juan Quinto Gonzales

Sinurat ti autor daytoy a daniw nga indatonna iti ay-ayatenna kalpasan nga nagkinnappia ti puspusoda. Naragsak dagitoy a dua parsua a nagsarak iti Paskua 1995. Iti matada uray awan balikas maripirip ti ayat nga agrimrimat iti tunggal maysa. [Ti letrato ket maysa la nga modelo].
Diwatani Inawaganka itay nabiit
Anian a ragsak timmukno sadi langit
Naglabas a kanito
Timekmo nangpunas ti saning-i

Agarup dua a bulan
Saanka a natan-awan
Kada rabii ladawanmo
Innak kapatpatang
Maiwaksik laeng naglabas a kalman

Pinatulodanka sangkapirgis a balikas
Innem nga aldaw napalabas
Nakaawatak iti tarheta
Naglaon naganmo ken naganko

Ita addaka ditoy dumdumngeg
Daniwko a makapakintayeg
Ti pusom ket luktam
Ta yawatko kenka ayatko nga ikutam.