|
|
| |
|
juan
quinto
gonzales
Timmanor iti Hawaii iti pamilia ti sakada. Nagbalin nga inspirasionna
ti amana gapu iti kinakired ken kinaanus daytoy. Nagawid ti pamiliana iti Filipinas apaman a nagretiro ti amana. Naisuro kenkuana ti kultura, pagsasao ken tradision a Filipino. Dimmakkel idiay Luna, La Union ket naadalna ti literatura ken kultura ni Ilokano ken ti kinananam ti pinakbet. Iti agdama, agnaed iti Maui, Hawaii. Maysa nga agtutubo a mannurat, graphic designer, computer specialist, letratista, entrepreneur, ken hardinero. Kangrunaan nga ipampamaysana ti panagtitipkel ken panagtitimpuyog dagiti Ilokano iti Internet, ti makunkuna nga information superhighway. "Iti baro a siglo, baro a milenio, agtultuloy latta a lutuen ni Ilokano ti pinakbet ta dayta ti tanda ni Ilokano," kinunana.
|
|
|
lorna
salvosa
agpay
Ni Lorna ti editor ti Filipino section. Tubo isuna iti siudad ti Naga, maysa a mannaniw ken agiwarwarnak a Bicolana, kumakanta iti banda, ken managayat iti nakaparsuaan. Maysa a feminista, isu ti nangbangon iti Bicol Women for the Advancement of Nationalism. Nag-editor in chief ti The Carolinians (pagiwarnak ti Carolina High School a nagturposanna) iti 1990-1992 ken staffer ti The Pillars, pagiwarnak ti Ateneo de Naga a nangileppasanna iti Communications Arts. Nagpaay kas investigative reporter ti Bicol Daily manipud 1996 agingga iti 1997. Iti agdama, maysa a columnist ken feature writer iti The Sunday Star, aglinawas a pagiwarnak iti Naga City.
|
|
 |
roy
vadil
aragon
Agsursuraten (ken agdrowidrowing pay) iti bukodna a komiks manipud pay idi adda iti elementaria. Iti haiskul ti immuna a nangpadasanna nga agsurat iti prosa ken daniw. Idi nagkolehio, ineditna dagiti pagiwarnak ti eskuelada. Nagpaay nga editor in chief ti maysa a trilingual (English, Tagalog, Iluko) a regional newsweekly. Nupay agsursurat met iti Tagalog ken English, ipangpangrunana ti agsurat iti Iluko. Kaaduan kadagiti sinuratna ti naipablaak iti Bannawag, ti kakaisuna a sitatalinaed a magasin nga Iluko a maaw-awagan iti "biblia iti Amianan." Nagab-abak metten iti pammadayaw manipud kadagiti nadumaduma a pasalip iti literatura nga Iluko ket iti agdama, addan walo a major awards a naawatna manipud idi 1991. Maysa a Fellow, a nangirepresenta iti Iluko fiction, iti 1996 UP National Writers Workshop a naangay iti Baguio City. Iti agdama, agpapaay iti College of Information Technology ti St. Paul University iti Tuguegarao, Cagayan, kas maysa a computer technical staff ken webmaster. Kasimpungalanna ni sigud a Mary Jane Guimmayen Daligcon ti Ballesteros, Cagayan, maysa a computer instructor iti St. Paul University. Addaanda iti dua nga annak, babai nga agnagan iti Sirmata Jane ken lalaki nga agnagan iti Sadiri Roy.
|
|
|
|
|
