ania no di lumang-ab karbon
ngem, ala, urayen ta rugso ni utek
ni mata ti utek bumlad met
iti karayo, iti rikna ti panunot
ni bara ti isip agkulibagtong
iti saguyepyep iti alunapet
aggurigor nga erkon
ni agbuteg a panawen

abrasaen ti imutektek
sarabagtit nga askaw
ken askaw ti pilid
ni ligay iti epifanio ti dalig
ni taft españa shaw aurora ayala
wenno alikuteg ti lrt
iti yuyeng flyover
iti tanem lagusnilad:
ungnguen ti kuriosodad
ni surat ti tinta iti papel
ti dungrit a baket a nakailad
ken ni karton maysa a bigat
wenno agmagid nga ubing
nga umud-od sobra a coke
agsapa ti dardaras ni kamkamakam
iti gabay ti cubao ortigas greenhills
wenno quiapo avenida baclaran
wenno alabang

wenno urat a lumteg
agpipikel iti kalilibed
sm ni city centerpoint megamall crossing
alintatao runoten biroken letra kada letra
kadagiti nbs: awan duliana: awan duadua:
libro literatura kritika klasika filipiniana
constantino pay margie holmes no kua
latta ken dadduma latta
iti isuamin a bookstore ken bangketa
agrungaab saka a di bumaddek
uray kaisuna a porsito
a gatad a para baliwag trans
wenno victory a pagawid
ngem libro ti libro ti basa
ti adik a mata ken arsab a biblioteka
ket ala, makaammon ni pagna
wenno ni boksit iti pagbiagna

paliiw-surat ni anninaw-letra
iti man nakipet umel-el a jeans
wenno nakiting a blusa: kinni-gari
kidday-puseg lag-oy-tangsit barukong
dagiti umatibelbel nga eva ni mm
kumikit ni nanette no kua uray
gretchen cristina ruffa dawn rita
a nakaaritan ngata
dagiti sanchez ni calauan
ta adda latta a napinta a kaduana
iti abante tonite remate bandera
dagiti tsomotsongki ni marikina
ngem ketdi met: umis-isem man, kaka
ni daytoy philippines 2000da
iti rupa ni manila bulletin
iti ngirsi ni imf-wb ken misedukasion
ni juan a mangurkuranges
a din makaanges mapaanges
iti man bangag sentimiento sinagoga
iti bus wenno katedral wenno templo
wenno supot a maitanggaya iti bangketa
para iti mamati a di mamati wenno
kumulding a puta nga agpaibuya
ken ni manila boy iti act wenno ocean
tandem wenno odeon

ay, adda rali dagiti dingraw ken virus
iti winayaanda a basura ken prosti
iti avenida iti ermita
iti recto adda ketdi dagiti batonsileng
nga agkaiwara: libronto latta
ti pagangayanna iti sarita kadakuada
dagiti pay ngay nakabenz nakabmw
iti bungsot dagiti agpappapa
iti pasig iti guadalupe iti divisoria
daniw a mangalunos
iti kurbata ti puruntong
ti kurdon iti bench
iti suelas ni bally ken florsheim
iti landmark wenno balintawak ti murkat
iti mcdo ken saisaki ni umareng-eng
nga impugedda iti sipnget ni luneta