Sadino man a paset ti law-ang
Addaka nga agtaytayab, ti angin kaduam
Sika a darak, kasilpo't biag, ayatko
Yebkasmo ti naganko, riknaem `toy pammateg

Sadino man a kadanuman, sadno man a kaulpan
Kadua ti anghel, kaay-ayam ti kulalanti
Sika a lasagko, kasilpo't angesko
Gaw-atem iti apros daytoy rupak

Agay-ayamta iti tagainepko
Denggenta ti uni ti sitsitik
Yindayonka iti saklotko
Bara `toy ayat innak iparikna

Dayta bassit nga ima inka kaniak ipatay
Dayta bassit a saka innak agkan
Dayta bassit a bagim iti arakupko mapudotan
Itugotnak iti yanmo ita a pakasarakan