9. Ti estoria ti kinaagmaymaysa ni Padre Deus

ALL MY LIFE, Teresa, all my life, I have never known happiness. Mamatika, Teresa, mamatika, kinunam kaniak Padre Deus.

        Kinunak kenka: You have said it all, Padre.

        Will you now listen, Teresa? Kinunam manen. Agsaknapen ti rabii ket ad-adda itan ti panangisalsala ti angin kadagiti saleng a naikagay iti turod ti monasterio dagiti de-rosas a madre. Kumamang daytoy a turod iti sabali pay a turod a nakakagay met laeng iti saleng ken iti adalem a kasipngetan.

        Iti ikub ti sangapulo a tawen, pinadpadaskon ti nagbalin a Kristo, Teresa. Alter Christus. Another Christ.

        Sangapulo a tawen a panagibtur iti saem a ginubuay ti opisial ken aprubado a depinision ti kinasanto: nobena, rosario, kumpesar, misa, recollection, retreat, colloqium, spiritual direction. Kaslakami sunay: uddog nga uddog.

        Uddog nga uddog iti sirkulo nga uddog.

        Enough of this, Teresa.

        Enough of this charade.

10. Rabii ti nalabaga a krus

INNALAK ti nakupin a sonatam, Padre Deus. Imparabawko daytoy iti bassit a lamisaan iti sikigan ti sopa. Daytoy ti aramidko no kasta a sumangpetka tapno iti isasangpetmo ket libasan manen dagiti anniniwan dagiti buteng ken panagamak a kasingenen ti biagta. Ken daytoy a sotana, Padre Deus, daytoy a sotana ti kongkreto nga al-alia a dadaulo dagiti nagsinantao a buteng ken panagamak nga itartarayantan ita. Mano manen a darikmat a lemmesenta dagiti anniniwan?

        Iti kaano man, dika liniputan, kinunam.

        Tell me again with conviction, Deus, insungbatko kenka. Iti umuna a gundaway, nangngegak ti bukodko a timek. Iti umuna a gundaway, binuniagakon ti im-imetek nga unget. Ken bain. Iti umuna a gundaway, Padre Deus, I am alone.

        I am alone.

        Tell me of a way out, Teresa, kinunam iti nababa a timek. Agpakpakaasi ti timek. Dumawdawat iti pammakawan. Makipalpalama iti pannakaisalakan.

        Imbulosko ti sangagabsoun a banang-es. Kinunak kenka: Your church has taught you one thing: To run away from your shadow. One thing I ask of you: Try at least to be faithful to your church.

        Tell me of a way--of a way out, kunaem koma manen. Ngem inatipaka. Intanggayak ti imak. Diak kayat a mabuak dagiti ansisit ken mangmangkik iti ulimek.

        Pinidutko ti nakupin a sonatam iti rabaw ti bassit a lamisaan. Iti apagapaman, pinigispigisko daytoy, pinirsapirsayko. Impennekko amin a gura, amin a bain, amin a rikna ti panagmaymaysa iti panangpigisko iti sonatam.

        Naregreg ti nalabaga a krus iti abito.

        Nakitak a nakitam ti pannakaregreg ti nalabaga a krus. Ngem dika nagkir-in. Dimo pinidut ti naregreg a krus.

        Get out, Deus, ibilinko kenka iti nakababbaba, nakaal-alumamay a timek.

        Get out of my life, please.

        Apagkunak iti panangpanawko kenka, nagalikuteg manen ti ubing a dumawdawat iti pannakaipasngay. Get out of my life and your goddamned private pains and sorrows and loneliness.

        Get out, kinunak, ket nakitak laengen ti anniniwanmo.

        Nagkulaidag manen ti ubing iti sikogko, ti ubing a nainaw iti hostia. Iti altar. Iti kalis. Iti bain.

11. Lampin iti kalis ti altar

I HAVE ALWAYS waited for your coming, Deus, believe me, kinunak kenka iti arapaap. Always. Saksik dagiti saltek. Kas ita a panaginnagaw ti sipnget ken lawag. Manipud iti duag a pangbuybuyaak kadagiti saltek nga umagek ken Apo Daga, masirpatko dagiti amin nga agsangpet.
        
      Rinugiak ti agkupin kadagiti lampin. Nakariknaak iti panaas iti panagalikuteg latta ti ubing a dumawdawat iti panakaipasngay.

        Ipasngayka, anak. Ipasngayka, kinunak iti ubing. Linallayko ti Magnificat. Idi malpas, insarunok ti You are a priest forever in the Order of Melchisedech.

        Nagsaknapen ti rabii ket nagkonsierto dagiti saltek.

        Insadagko ti ulok iti kawayan a teddek ti duag. Agkonkonsierto latta dagiti saltek. Iti anaraar ti darudar, makitaka ita, Padre Deus, makitaka ita, Deus. Makitaka ita iti agpakpakadan a lawag. Kunaem kaniak: Teresa, kaduaka a mangsarabo iti panagtao ti ubing a nainaw iti bain.

        Sungbatanka, Padre Deus: Nagtagilasag nga ayat ti anakko.

        Sungbatannak met: Anakta, Teresa.

        Rinugiak a kupinen dagiti lampin. Makitkitakon ita ti panguloten nga ubing, agririaw iti panangdawatna iti ayat.

        Nagmanton ti rabii ken nakupinkon dagiti lampin. Di latta agsardeng ti konsierto dagiti saltek.