1
Dagiti robot nga abalbalay da Ansit ken Atong, ap-apalak man
Nagpipintasda: makapagna, aguni-uni, agsilawsilaw, nagmamayat
Kunan' Francis, ay, ni Ansit gayam:
"Ay, ti robotko ngamin a sagut ni Daddy manipud `Merika
Kalalainganen ken katatarakian ken kasisiglatan
Ay, ta ngamin mannakigubat iti intero a law-ang
Ibalatna amin a kita ti robot, isut' kasikatan
Gumagabbo, umeespada, pumapaltog ken agmadyik pay!"
Kunan' Renato, ay, ni Ansit gayam:
"Ay, ti robotko ngamin a sagut ni Papa manipud Yu-es-ey
Kalalainganen ken katatarakian ken kasisiglatan
Ay, ta ngamin pagarianna amin a lubong ken langit
Parmekenna amin a klase ti robot, isut' kabidaan
Rumeresling, umiiskrima, pumapaltog ken agmadyik pay!"
2
Da Ansit ken Atong, kanayon man nga agpinnasikat
A robot tunggal maysa isut' bida, awan paabak
Ket iti maysa ngarud nga aldaw
Da Ansit ken Atong indan kinuna:
"Ay, ngarud man tapno makita a talaga
No asino kadagiti robotta ti pudno a bida
Inta man ida paglabanen tapno adda man mamingga
Ket mabati ti nasiglat ken nataraki ken kalaingan
Nga agari iti amin a lubong ken langit ken law-ang!"
Permit' ragsakko ta itan innak mabuya
Panagranget dagiti dua a robot a bida!
3
Ket ni Ansit inna man inikkan nakabarbaro a bateria
Robotna a gumagabbo ken pumapaltog ken umeespada!
Ket ni Atong inna man kinuerdasan a kinuerdasan
Robotna a rumeresling, pumapaltog, umiiskrima!
Ket, ayna, nagrupaken dua a robot: nagkinnammet, naggubalda!
Kunan' Ansit: "Sige, robotko, rangrangkayem, ungawem dayta!"
Kunan' Atong: "Tira, robotko, lasanglasangem, pukawem dayta!"
Ket dagiti robot, anian siglat a naglaban a naglaban
Nabateriaan a nabateriaan ken nakuerdasan a nakuerdasan
Naggabboda, nagresling, nagennespada, nagpinnaltogan
Ket da Ansit ken Atong ken siak, unay nga iriag-ragsaknan!
Ngem idi nagsardeng ti ranget dagiti robot
Nagmulagat ni Ansit, ni Atong nagmisuot
Ta dagiti robotda metten, ayna, anian nagbanagandan!
Parehodan a nadadael: narangrangkay ken nalasanglasang!
4
Dagiti robot da Ansit ken Atong nga ap-apalak, ay, sayang!
Nagpipintas: makapagna, aguni-uni, agsilawsilaw, nagmamayat
Ngem ania pay ita naungaw ken napukawdan!
Ngem kunan' Francis, ay, ni Ansit gayam:
"Agpagatangak manen ken ni Daddyk idiay 'Merika
Nalalaing, natartaraki, nasigsiglat!"
Ket kuna met ni renato, ay, ni Atong gayam:
"Agpagatangak manen ken ni Papak idiay Yu-es-ey
Nalalaing, natartaraki, nasigsiglat!"
Kunada pay: "Ay, ngarud man ituloytanto ti panaglaban
Dagiti robotta tapno makita ti talaga a bida
Ken no asino a talaga ti ari iti amin a lubong ken law-ang!"
Ay, ket permi met lattat' ragsakko ta innakto manen mabuya
Panagranget dagiti robot da Ansit ken Atong a pareho a bida!
1993
