Lumibeg ti danum a dinalapdapan ti rama
ngem adda kan' dita ti pangibulonanmi
iti balonmi a baak a basi. Ket inakasmi
ti kamang dagiti billit-tuleng a nabannogan.
Ti puseg ti danum, nalamiis man unay.
Sangkadungpar dagiti lames ti gurongko,
malaglagawan: "Sinnokayo a nangbasak
iti bukodmi a pagarian?" Ngem adtoykamin!
Aggargarakgak nga agkaras: Nalayasen
ti sinilong iti sagpat. Ket iti agmatuon,
napamulagat. Imbaas ti danum, namingmingak
dagiti ballaiba a napasag. Awandan
a paglemmengan
dagiti lames nga aginnayat. Idinto
a dagitoy lames didanto ammo:
sadino ti tarayanda, sadino?
Ti dalag, kimmubukob. Ti gurami, bimsag
iti danagna. Ngem `toy maysa a paltat
siningkilna ti tammudo ti sakak.
Ket kasla adda nabileg a koriente
a nangdugsak kaniak. Kumilikili pay.
"Naubing ti nangdarup kenka," kunan'
Manong Berning. "Sidadaan a pumusay!"
"Tapalanta't baranibod." kunan' 'Sinsin
Erning; agwingwingiwing. Sumarut dagiti matan'
Lilo Immong: Kunkunana: Nakitayon?
Lengngesnan ti rebelde a paltat. Agkulkulagtit.
Mulmulagatannak. Iti pungtotko, insebbak
iti aggargarakgak a temtem iti igid ti tambak.
Ibulonka iti basi, impangtak. Ngem adda latta
ti koriente iti kaunggak. Pagbibinegennak.
Boltahe a mamarparigat.
Ayna, awan utekna iti kunak.
Ngem adtoy a sinagutan ti diosenda
iti bileg a namagwingiwingak.