[an error occurred while processing this directive]

 

Pakpakatawa
ni Andy Barroga

 

bapor.jpg (3542 bytes)

Bulto a Mangisalakan

Nairana a nagkalugan ti padi ken ti pastor iti maysa a pampasahero a bapor nga agturong iti sabali nga isla. Sangkauyaw ti pastor ti padi gapu iti ub-ubbaen daytoy a bulto a naaramid iti kayo.

     "Diay 'yanmi," inggumintang ti pastor, "saanmi a didiosen ti nakitikitan a kayo!"

     Nagkakatawa dagiti nakaimatang a pasahero.

    "Kakabsat, diyo kadi ammo a ti bulto ket mangisalakan?," naalumamay ti padi a nagsarita.

     "Kasano koma a maisalakannaka dayta ket kayo? Ala man?," nagkumpas pay ti pastor a nangitudo iti padi.

    "Apo, pakawanem ida ket dida ammo ti sasawenda," intanamitim laeng ti padi. Adu pay nga lais ken uyaw ti nasagrap ti padi. Idi pagam-amuan la ta nagkimat sa naggurruod. Idi kuan, nagtudo, sa sinaruno ti napipigsa nga angin. Agbagyon! Nagdalluyon iti dadakkel. Iti saan a mabayag, nagbaliktad ti barko ket naarinebneb. Nalmes amin a pasahero malaksid iti padi.

     "Kunakto pay kadakayo, saanyonto met patpatien a makaisalakan ti bulto." Agtantanamitim ti padi a nakarelaks iti pagpatpatawanna a bulto.




tangken.jpg (611 bytes) Kinnatangkenan ti Ulo

Naangay ti maysa nga internasional a kontes iti kinnatangkenan iti ulona a tao. Tallo a nasion laeng iti nakaitured a nakisalisal: Filipinas, Hapon ken America. Immuna a naawagan ti Hapones. Sipapardas daytoy nga immuli iti entablado ket kinunana a sipapangas: "Tupakanyo ti ulok iti kadakkelan a bato!"  Adda nangtupak iti kasla burnay a bato iti ulo ti Hapones ngem di pulos nagkir-in daytoy.

    "Nangabaken!!!" impukkaw dagiti agbuybuya.

    "Sumaruno... Amerikano!!!" impukkaw ti parawaragawag.

    Silalastog ti Amerikano a nagpaentablado. "Lansaanyo ti ulok iti kadadakkelan a lansa!!!" impukkaw ti Amerikano. Adda nangpadas a nanglansa iti ulo ti Americano ngem napilko laeng ti dakkel a lansa.

    "Huuu!!! Mangabak daytan, a! Awan mangabak ken daytan!!!" impukkaw dagiti agbuybuya.

     "Adda kad' pay pangabakyo a Filipino?" inyuyaw met dagiti agbuybuya nga Amerikano.

     "Maudi a kontestant," impukkaw ti parawaragawag, "isu nga awan sabali no di ni Doro a pagtangtangsit dagiti Filipino."

    Nagpapalakpak ken nagiiriag dagiti Filipino. Ngem napabutngan sa ni Doro ta saan a nagparang iti entablado. Namin-adu a naawagan ti naganna ngem kaskadi a saan a nagparang.

     "Mangbilangak iti tallo, no dika pay la nga agpatnga ditoy, Doro, ket awankan!" impukkaw manen ti parawaragawag. Ngem saan latta nagparparang ni Doro agingga idi iwaragawagdan ti nangabak.

    "Maysa lat nangabak kadakayo nga tallo!" impukkaw ti hurado, "Filipino!!! Talaga a natangken ti ulona--saan pulos a mangikaskaso!"






Andy Barroga TI AUTOR: Tubo ti Luna, Apayao ni Andy Barroga ngem agnaeden iti Honolulu, Hawaii. Maysa a nasaldet nga agngayangay a mannurat, masirarat ti namaris a masakbayan ni Andy iti panagsuratan iti Literatura Iluko. Kitaen dagiti gapuananna iti bukodna a website iti http://www.aloha.net/~barroga.

Menu