|
Nadumaduma a panirigan manipud iti Dap-ayan ti Burnay E-zine |
|
|
Iti maikari a butosan a kandidato...
Panirigan ni David Antonio, dwantonio@erols.com Nai-post idi 4/16/98 Saan a gapu ta siak ket managindadalus wenno napnuan sirib ket laisek ni Bise Presidente Estrada. Ngem iti panagkunak, ti kangrunaan a saludsod no intay pilien ti sumaruno a pangulo ti pagilian isu daytoy: SIASINO KADAGITI AGNGAYANGAY A PABUTOSAN TI ADDAAN KADAGITI KABABALIN A KASAPULAN UNAY TI MAYSA A PRESIDENTE ITI AGDAMA A KASASAAD TI PAGILIAN A PILIPINAS? Saantay met ketdi a dawaten a ti mangidaulo kadatayo ket maysa a santo wenno anghel--a di namulitan iti basol a tawid. Numan pay kasta, saan kad' met a nasken a ti presidente ti maysa a pagilian ket addaan iti umisu a KINASIRIB (intelligence), KABABALIN (moral character or credibility), SIRMATA (vision) a maiyataday iti akemna ken iti kinasiasino (mamati/managbuteng iti Dios, mangisakit ti ili ken pada a tao, managparbeng, manangngaaasi, etc.) dagiti umili? Saan ngata a biddut no kunaentayo nga agsipud ta kasla awan met simmayaatan ti biag ni Filipino bayat ti panagturay dagiti masirib, kasapulan ngarud a butosantayo tay' saan a nasirib? Saan a KINASIRIB ti akimbasol iti saan a panagrang-ay ti biag ni Filipino. Ta no surotem dayta a turong ti rason, kasla pinagbalinmon a dakes amin a masirib. Ti ayan ti basol isu dagiti masirib a nagpangulo A NANGUSAR ITI SIRIBDA NGA AGPAAY ITI BUKODDA A PAGNAM-AYAN. No pinilik ni adda kapkapuyna gapu ta napaayak ken ni masirib, maiyarigak 'tay lakay a nangisukat ti kotsena iti tricycle agsipud ta amin a malugananna a kotse ket adda pagkunaanna. Nalabit saanna a naamiris a ti sungbat ti parikutna ket BARO A MODELO TI KOTSE. Ti maysa pay a saludsodek iti bagik sakbay nga agbutosak isu daytoy: MAIPAGPANNAKKELKONTO NGATA DAYTOY A TAO NGA INNAK IBUTOS? (Is the person I am going to vote for now, someone I am going to be proud of as my President?) Panirigan ni Andy Barroga, barroga@aloha.net Nai-post idi 4/17/98 Iti bukodko a kapanunotan, ti NASKEN la unay ken UMUNA a maaramid iti Filipinas ket 'tay PANNAKAPAKSIAT dagiti bukatot nga agtuturay. Panagkunak, saan laeng a 'tay KINASIRIB iti mamagbalbaliw iti Filipinas no di ket kangrunaan na la unay daytay KINAPUDNO dagiti agtuturay. Kanunongak met ti naagapad a “MAIPAGPANNAKKELKONTO NGATA DAYTOY A TAO NGA INNAK IBUTOS?” Husto daytoy ngem sapay koma ta saan a `tay kinalaingna nga umingles ti maipagpannakkel no di ket `tay KINAPUDNOna a mangidaulo iti pagilian. Saan a gapu ta saanak a masirib ket butosak met `tay padak a saan a masirib. Ngem no pagpiliennak iti kamatis iti uneg iti bay-on a napunnot' nalungsot a kamatis, ay, ket piliek met, a, `tay napintas bassit! 
|
|