[an error occurred while processing this directive]
Menu
 

sabong ti rosas no
duaduaem
pay

nobela ni Roy V. Aragon




Maika-4 a Paset

DI AMMO ni Sadiri no siddaaw wenno pannakaklaat ti nagsikaw iti barukongna idi mangngegna ti pakaammo ni Elaine. Ngem maymaysa ti nasiertona a kaipapanan ti siddaaw wenno kellaatna: danag. Wenno amak. Sumagmamano a darikmat a napaumel, binibineg ti dina mainaganan a karirikna. Nagsennaay laengen idi agangay.

"Relakska laeng, Sadiri," kinuna ni Elaine iti ungto ti linia ti telepono. "Panagkunak, dika rumbeng a maalarma no nagsurat man ken ni Cedrick. Indawatna a diak koma dakdakamaten kenka ti inaramidna. Ngem I'm concerned a talaga kadakayo, nasken a maammuam. Saan a gapu a malakaska kaniak--nga adayo a kaykayatko a sika ti makatuloyan ni Joyce. Ngem pakadanagankay' met a talaga. Marisut koman daytoy a parikutyo iti kabiitan a panawen! Ti kallaysayo..."

"Sinuratanna ni Cedrick, Elaine... Ania ti kayatna a mapasamak?" sisikapsut a kinuna ni Sadiri.

"Justification, basta kunana met. Lawlawagenna la kano ti amin. Awan met sabalin nga intensionna. Patiek, Sadiri. Ma-guilty ngamin isuna thinking Cedrick was so wronged--that she particularly, wronged Cedrick. Maawatanta koma, Sadiri. Mariribukan pay laeng ni Joyce. Patiek a padpadasenna la a patibkeren ti bagina to decide the right things."

"Maawatak, Elaine. Isu a diak kayat a singaen. Bay-ak nga isu ti agikeddeng. Ken Elaine, rugrugiakon nga isagana ti bagik kadagiti mabalin a mapagteng. After all, basolko amin dagitoy. All my fault. Awatek dagiti konsekuensiana. Anyway, sanayakon nga agibtur ken mapaay, Elaine..."

"Sus, Sadiri, dika agsao iti kasta! Nasapa pay tapno mangbukelka iti konklusion! Dika koma maup-upay! Apay, patiem kadin a dinakan ay-ayaten ni Joyce?"

Di simmungbat ni Sadiri.

"Sadiri? Sadiri, friend, cheer up! Apay, agduaduaka no ay- ayatennaka pay ni Joyce wenno saanen? Ammom ti pudno, Sadiri! Am-ammom unay ni Joyce, di met? Am-ammom ti ayatna--ammom no kasano ken inggat' kaano ti panagayatna! Have faith! Agtalekka kenkuana! Agtalekka iti bagim!"

Di latta nakasungbat ni Sadiri.

"Sadiri, patalgedak a sika pay la ti ay-ayaten ni Joyce. Madlawko, madlawko la unay dayta kenkuana kadagitoy. Ni Cedrick? Dimo pakadanagan ni Cedrick, Sadiri. Uray pay no sinuratan ni Joyce. Sentimental la ngamin ni Joyce, ammom met. Siempre, narigat met a malipatan wenno maiwaksina ti nabayag a relasionda ken ni Cedrick. Medio pagpampanunotanna met dagiti natungday nga arapaapda. Ngem dinan tarigagayan a maisubli dagita, ammok. Past is past. Sadiri, agtalekka--saan a ti klase ni Joyce ti agbabawi--a tallikudanna ti agdama ket agsubli iti napalabas. Ti agdama, kasta metten ti masakbayan, ket dakayo a dua—saanen nga isuda ken ni Cedrick!"

"Okey, okey, agyamanak unay iti pammakiredmo, Elaine. Actually, diak pay met a totally a maawanan iti namnama. Ngem agdependeak latta iti desision ni Joyce no bilang. Ay-ayatek, ket no ania ti ikeddengna, no isut' umno ken pakaragsakanna, awatek. Wen, Elaine, awatek lattan uray no kaipapananna ti panagsakripisiok..."

"Ayna, Sadiri, no mabalin, dimin kayat a mapaayka. Maasiankam' ken Francis kenka. You deserve to be happy. Adda met karbengam nga agragsak. So, strive to be happy also, 'niaka metten!"

AWAN ti di mangikagumaan nga agragsak; awan ti di agkalikagum iti ragsak. Ngem no apay met a ti pudno a ragsak agramut iti nakana a liday. A no dimo maibturan a matilmon ti apro ti tarumpingay, dimo met maipapas a mananam ti diro ti ragsak... Nagsennaay manen ni Sadiri. Intangepna ti bidbidingenna a libro a panggepna a basaen a pangiwagatna koma iti dandanag ken am-amak ken up-upayna. Ken pagpatawanna koma iti mangar-arinebneb a kinakawaw ti kinamaymaysana ita a rabii itoy taengna. Kayatnan a paiturayan iti idea a mapukawnan ni Joyce. Ta ania koma ti kaipapanan ti di pay la pannakaikeddeng ni Joyce iti umno nga aramidenna? Apay a mariribukan la unay? Gapu kadi ta ilalaenna pay la unay ti relasionda ken ni Cedrick? Isu a sinuratanna ti sigud a nobiona? Aglagaw ni Sadiri: apay metten nga agduadua ita ket alimonen ti danag ken buteng ken upay? Maaw-awanan kadi metten iti simbeng ken tibker ti pakinakemna?

Lagip... Apay aya ngamin a nagayat la unay ken ni Joyce nga isu a nakaaramidanna iti di mainugot a nakagubuayan daytoy a parikutda ita? Masimpuon ni Sadiri no kaano ken agingga. Ken maibagana no ania wenno kasano. Ngem dina kabaelan no apay. No apay nga ay-ayatenna ni Joyce. No pudno ken nasudi nga ayat, naamiris ni Sadiri, dimo gayam maipatarus wenno maibagasan no apay. No apay aya. No apay pay laeng. No apayto pay la ngamin. Basta inay-ayatnan ni Joyce sipud nariknana no kasano ti agayat. No ania ti ayat. Ket saanen a masapul a duktalen pay no apay. Patien ni Sadiri a masungbatanen ti kinaapayna babaen ti kinaaniana ken kinakasano dayta nga ayat.

Ket no apay met ngamin a ni lattan Joyce ti babai a nakariknaan, pakarikriknaan ken pakariknaannanto iti dayta nga ayat. No apay met a naibtur ket nagitured a nangtaginayon ken nangsalimetmet iti dayta nga ayat. Pulos, di maikkan ni Sadiri iti material a palawag. Saanen, saanen a nasken nga ipalawag babaen ti balikas wenno surat wenno literatura wenno ania pay a wagas tapno laeng mautob wenno maadal ti kinaapayna--umdasen a maisip wenno maipaisip ti utek ken marikna wenno maiparikna ti puso.

Daytoy nga ayat met laeng ti nangibaon ken ni Sadiri idiay Saudi. Ket daytoy met la nga ayat ti namagtalinaed kenkuana sadiay iti aganay a lima a tawen. Lagip... Tapno maadawyanna ti sidir ken saem: patien ni Sadiri a daytoy ti kangrunaan a gapu a napanunotna ti agabrod. Kayatna a tulongan ti napanglaw a pamiliana idiay probinsia; kayatna ti makapundar iti pagbiagan, agurnong--gapu met dagitoy, ngem maikadua laeng a panggep idi ni Sadiri. Umuna a talaga ti gagemna a papasanna ti bagina, ti isipna, ti riknana. Ta no apay pay la ngamin nga inayatna ni Joyce ngem dina met winayaan idi ti riknana. Inikutanna lattan a bukbukod; induldulin, inlemlemmengna lattan. Impariknana met; impadlawna met, ngem dina met imbatad iti sangonsa-ngo, iti rupanrupa. No apay met. Kaubingan, kaarruba, kaeskuela, kagayyemanna la ngarud ni Joyce. Ken, ketdi pay, adda met marikna ken madlawna idi ken ni Joyce. Saan a gagangay ti kinadekket daytoy idi kenkuana. Saan la a rikna a kas gayyem wenno kas kabsat. Adda met, wen, adda met umasping a rikna idi ni Joyce. Wen, kas ilatakto met la ken paneknekanto ni Joyce inton agkinnaawatandan iti kamaudianan, kalpasanto a madadael ti relasion ti balasang ken ni Cedrick... Ah, nalabit agur-uray laeng iti umno a gundaway ken panawen idi ni Sadiri. Ngem isu metten a dimteng iti baetda ni Cedrick. No apay met nga impalubosna idi a paunaan pay la ken ni Cedrick. No apay pay la a nagpabus-oy. No apay a pinilina ti nagsakripisio. Gapu ta gayyemna ni Cedrick. Ket nakitana met a naragsak idi ni Joyce ken ni Cedrick. Kontenton idi. Ibturanna laengen; medmedanna laengen ti riknana. Tagiragsakenna laengen ti ragsak ni Joyce ken ni Cedrick. Nupay balangkantis a ragsak ta iti nalimed, sensennaayenna, ladladingitenna a bukbukod. Ta matakuatannanto, uray inton padasenen ni Sadiri ti agayat iti sabali a babai, dinanto maiwaksi ni Joyce. No apay met. Ah, no apay met! Makapaluksaw, makapabagtit a kinapudno: maymaysa ti babai iti lubong--ni laeng Joyce! Ket agingga a makitkitana, makapatpatangna latta ni Joyce, manipuden panagubingda agingga iti kolehio ken trabaho, dinto, wen, dinton maulbod ni Sadiri ti bagina: dinto, dinton agtalna ti puso ken utekna a mangipateg itoy a babai uray pay kaipapananna met ti patinayon a sidir ken saem a mariknana iti panangpadasna a mapnek lattan a mangay-ayat iti nalimed itoy. Sidir, wen, ta no apay a binaybay-anna ti riknana: no apay ngamin ta dina inrupir wenno inkalintegan ti ayatna. Ta no inaramidna koma, pagaammona, inaklon, inayat koma ni Joyce. Saem, wen, ta iti unos ti sidir, inawatnan nga awanen maaramidna wenno mabalinanna tapno koma maragpatna ni Joyce... Alimbasagen ni Sadiri kadagitoy nga ir-iruken, ket idi awisen ti maysa nga am-ammona nga agaplayda nga agtrabaho idiay Saudi Arabia, saanen a nagpangadua ni Sadiri...

Idiay Jeddah, Saudi Arabia, iti maysa a multinasional a kompania ti langis a nagpaayanna kas computer analyst, pinadas ni Sadiri nga inyaw-awan ni Joyce. Mailiw, ma-homesick a makuna idi damo. Ngem apay koma? Impilitna nga inisip nga awan karbenganna a maila ken ni Joyce. Inggubetna dagiti obrana. Computer lattan ti impasnekna a sinango ken sineknan. Pinadasna nga inobliga ti bagi ken panunotna a bag-en ti computer, a bag-enna ti computer. Binibinegna amin a riknana a sumga. Trabaho. Trabaho. Trabaho. Urnong. Salimetmet. Urnong. Inut. Urnong. Patulod iti pamilia. Urnong. Trabaho. Trabaho. Computer. Computer.... Pinadasna a putden amin a pakainaiganna ken ni Joyce, kada Joyce ken Cedrick, idiay Filipinas. Saan a nagsurat wenno immawag. Computer. Trabaho. (Ken liblibro pay) Urnong. Trabaho. Trabaho... Ngem napudno a gayyem da Joyce ken Cedrick ket dagitoy ti nagsurat ken immawag ken ni Sadiri idi ipapatinan a di kasuen dagitoy. Apay metten a dika makalagip? kinunada. Nasakiten ti nakemmi kenka. Agpagpagunggankan, aya, nga agpabaknang? Hoy, agsuratka mammet, a! Adda kadin nasarakam nga Arabiana dita? Dina matallikudan dagitoy ket manipud idin, regularen a makisinsinnurat kadagitoy wenno makipatang iti long distance iti telepono. Aglalo idi planuen ni Cedrick ti agabrod met. Masansan a patulodan ni Joyce iti greeting cards. Suratan pay no kua ni Joyce ket agipadamag kadagiti banag ken pasamak iti opisina, iti probinsia, ti relasionda ken Cedrick. Di met maitured ni Sadiri ti di agipatulod met iti greeting cards ken subalit. Ket awan pagmamaayanna ti panangpadas ni Sadiri a mangiwaksi iti riknana. Kimmaro ketdi ta kailiwna la ngaruden dagiti surat ni Joyce. Ti timek daytoy. Pulos, dinanto mabalin a di kasuen ti sigud ken lumallalo nga ayatna a pudno a saanen a mamagtalna iti puso ken utekna.

Ket agbaybayag ni Sadiri iti Saudi, rumabraba ti tarigagayna ken ni Joyce. Agingga a mapampanunotnan nga ikalintegan ti ayatna--nga ipilitnan daytoy ket dinan raemen wenno bigbigen ti namagbabaet kadakuada kada Joyce ken Cedrick a makatubeng iti gagemna. Patpatibkeren ngaminen ti pammatina nga adda met pategna ken ni Joyce. Pateg, saan la a pateg, ammona: adda met panagayat ni Joyce kenkuana. Nabukel idin ni Sadiri nga uray dinan dayawen a gayyem ni Cedrick. Ipatungpalna nga ipatungpal, iti kasayaatan ken kasamayan a pamuspusan. Mapulkokan unay idin ni Sadiri. Pinampanunotna a pinampanunot no kasano ken kaano nga iwayatna ti panggepna. No utobenna ita dagidi, ita la a maammuanna a desperado idin. Nalabit dinegdegan ti naundayen a panawen a kasla panangibelleng ken panangibaludna iti bagi ken riknana iti ganggannaet a daga. Aglalo idi adda metten ni Cedrick iti Saudi, sangkalagipen ni Sadiri ti kuna ni Cedrick nga apaman a malpas daytoy ti dua a tawen a kontratana, agawiden ket agkallaysadan ken Joyce. Agkallaysadan! Awanto ngaruden ti maaramidan ni Sadiri. Ngem adda pay gundawayna, nasken a makapanunoten iti sierto a pamuspusan sakbay nga agkallaysa da Joyce ken Cedrick...

Ket idinto a mangin-inaw ni Sadiri iti planona a mangagaw ken ni Joyce, dina namnamaen nga adda gayam bukbuklen met ni Cedrick a plano. Ket di pagarupen ni Sadiri nga umay-ayon ti amin iti panggepna. Ket makalawas sakbayto ti awid ni Sadiri, awisento ni Cedrick idiay Riyadh a pagrubuatannanto. Ket dinto ekspektaren ni Sadiri nga ibinsanto ni Cedrick ti plano daytoy a mangsubok ken ni Joyce. Maklaatto iti maammuanna a kasla nabaybay-anen ni Cedrick ni Joyce. Dina ammo dayta a parikut dagiti dua. Din unay sursuratan ni Joyce ket mabain metten nga isu ti agsurat wenno tumawag iti balasang. Maklaatto inton maammuanna nga agduadua unayen ni Cedrick iti balasang no ay-ayaten pay la daytoy. Ipudnonto ni Cedrick a medio nabaybay-anna a talaga ni Joyce gapu iti pannakakumikomna unay kano iti trabahona. Amangan no adda sabalin nga atap kaniak ni Joyce, kunanto ni Cedrick, amangan no dinakon ay-ayaten. Diakon masursuratan unay ket awan metten sursuratna... Ket agtulagdanto ken ni Cedrick: suotenda ni Joyce babaen ti panangarem ni Sadiri itoy. Kurangto la nga aglaglagto ni Sadiri iti ragsakna. Ngem dinanto ipadlaw ken ni Cedrick. Aglalo inton kunaen ni Cedrick: No agballigikanto a mangpaayat kenkuana, awatek, respetarek. Ket kablaawankanto laengen iti simple a congratulation! Dinto masbaalan ni Sadiri ti ragsakna, ti riknana. Ket kunanto ni Cedrick: Ammok, maragsakanka unay. Ammok, ay-ayatem ni Joyce. Ammomi. Imbaga pay kaniak idin ni Joyce--nadlawna kano unay. So, this is your chance. Ngem sorry ta diak mamati a laksidennak ni Joyce. Ay-ayatennaak daydiay. I trust her. Pupuotem, Sadiri, dika la ketdi agballigi! Optimistikonto unay ni Cedrick. Mangnamnamanto unay. Agtalek unay ken ni Joyce. Ket agtalekto unay met ken ni Sadiri. Kunananto pay: Diak agpangadua nga agkammatalek kenka, Sadiri. You're a best friend. Ammok a tantanangem. Mabalin nga aramidem amin a kabaelam a mangallukoy ken ni Joyce ngem ammok a nataknengka. I know it would be a fair game. Saritaan ti adda nakemna. Tulag ti lalaki. Agkarinto ni Sadiri. Agyamanto ken ni Cedrick. Yangawnanto a dinto koma agbabbabawi ni Cedrick no bilang ta agballigi. Ngem napigsanto latta ti pammati ni Cedrick. Kunananto latta: Diak panunoten a mangabakka, Sadiri. Ta ammok a talaga a dika agballigi. Ay-ayatennak ni Joyce. Nabayagkamin. Narigaten nga agsinakami. Agkallaysakamin no malpasko ti baro a kontratak. Ngem no agballigika, Sadiri, okey latta kaniak, awatek. At least, nalag-an met a panunoten no kua ta sika met la ti papananna, awan sabsabali. Ah, ngem diak panunoten a kasta, ta dikanto met la agballigi, Sadiri! Ha-ha! Mangsapulkanto ketdi laengen iti ikasarmo met ta uray aggigiddantayonton! Talaganto a dakkel ti panagtalek ni Cedrick. Ngem itinto un-uneg ni Sadiri, masdaaw no apay a napanunot ni Cedrick a suboken pay la ni Joyce no agtalek la ngarud unayen nga ay-ayatento latta ni Joyce. Apay a duduen pay la ni Cedrick? Ah, ngem dinton pakasikoran ni Sadiri dagita banag ta aglablabbetton ti ragsak ken gagarna a makaawiden tapno maipatungpalna ti tulagda ken ni Cedrick. Sumronton ti napalalo nga iliwna ken ni Joyce ket rumrumsikto iti puso ken utekna ti ayat--ayat nga impuppupokna nga itan mabulosan ket siwawayawayan nga agbulanos.

AWAN pay masnop a wagas ni Sadiri idi a pangagawna ken ni Joyce agingga a naammuanna ti plano ni Cedrick. Ket impettengna nga iti aniaman a pamuspusan, natanang ken saan, agballigi ken ni Joyce. Gundawaynan. Gundawayannan. Awanton maaramidan ni Cedrick. Ket inwayatna ngarud ti tulagda: inaremna ni Joyce. Ngem sakbayna, inwayatna ti naikeddengna a wagas: pinerdina ni Cedrick....

A puon itan ti parikutda. Daytoy ngatan ti kunkunada a karma, naisip ni Sadiri. Insublina iti estante ti libro a dina marugian a basaen. Imbaltogna ti bagina iti nalukneng a kamana. Ginuyodna ti iiddepan ti lampshade iti makannawanna. Inalikumkom ti kinakawaw. Ngem iti sipnget, nagtagilanga latta ni Joyce: umis-isem. Idi kuan, agsangsangit. Ket idi kuan, makapungtot. Umis-isem. Agsangsangit. Makapungtot. Nagbaliwbaliw ti rupa ni Joyce iti alintatao ni Sadiri. Ngem pinilitna a pagtalinaeden ti umis-isem a langa. Dika agdanag, sika ti ay-ayaten ni Joyce. Ammom no kasano ken inggat' kaano nga agayat ni Joyce. Ammom...

Uray piliten ti idea a din ay-ayaten ni Joyce, agtalek pay met la ketdi ni Sadiri iti ammona a panagayat kenkuana ti balasang. Ngem kasla kayatnan a patien nga ay-ayaten pay met la ni Joyce ni Cedrick. Madanagan iti posibilidad a dinan kabukbukodan ti ayat ni Joyce. Ket mabalin a mapukawna daytoy no kaskasano--di la ket ta tuntonen ni Cedrick ti karbenganna ita naammuanen daytoy ti agpayso!

Diak a talaga namnamaen. Ania metten a gasatko, nakuna ni Cedrick idi itawag ni Sadiri a sinungbatanen ni Joyce. Nadlaw unay ni Sadiri ti pannakailabeg ni Cedrick. Nabayag a di nakauni daytoy ket idi agsao, barbaren ti timekna. Napnuan sanaang. Napnuan babawi. Diak ipagarup. Sobra ti tiwalak. Ti ammok, ay-ayatennak pay, insaning-i ni Cedrick. Ket madanagan idi ni Sadiri. Na-guilty. Nangrikna iti panagladingit ni Cedrick. Ta talaga met ngamin a guilty. But don't worry, napudnoak iti tulagta. Awatek a naabakak. Awatek ti pannakapaayko. Dika madanagan, awan sakit ti nakemko kenka. Takderak ti karik iti tulagta. Lipatekon ni Joyce. Padasek ti agayat iti sabali. Adda met ketdin kayatko a sirpaten ditoy. Agbabawi met idin ni Sadiri iti inaramidna. Maay-ay ken ni Cedrick. Ngem impatangkenna: no ni ayat ti sumken, maaramid ti amin. Ayat ti gapuna. Mapabasol kadi ni ayat? Congratulations, Sadiri. Take care of her. Good luck kadakayo a dua. Daydin ti naudi a panagpatangda ken ni Cedrick, ammo ni Sadiri, ta saanen a nagsurat wenno timmawag pay ken ni Sadiri.

Ket itan, sinuratan ni Joyce ni Cedrick... Naaliaw ni Sadiri: langa ni Cedrick ti timpuar iti sipnget: makapungtot, mangipangpangta! Diak mamati a laksidennak ni Joyce. Ay-ayatennak. Nabayagkamin. Narigaten nga agsinakami pay. Pupuotem, Sadiri, dikanto agballigi!

RABII a di met makaidna ni Joyce: ....Ay-ayatek wen ay-ayatek pay laeng ti kunak iti laksid ti amin ngem no apay metten a diak maako wenno mapennek kenkuana ket kastoyen ti mapaspasamak a pagbutngak pagdanagak ket agduaduaak wenno sibabasolak la ngata aya ket agbabawiak a nagayat ah ngem ay-ayatek wenno diakon ay-ayaten ta diakon maayat kaipapananna kadin nga ay-ayatek pay la gayam wenno ay-ayatek latta ni Cedrick amkek amkek ta apay a napateg sayangek a kasla kayatko a pasublien a silpuan a pasantaken manen dagiti natungday nga arapaapmi a nagrigat la ketdin a malipatak ken naynay a tagtagisayangek ket danagek ta iti maysa a gundaway ket mariknak nga ay-ayatek ni Cedrick ngem dagusko met la nga ilibak iti bagik ket ungtak sidirek ti pusok pagturayek iti isipko a di maikanatad wen rebbengna ta saanen a mabalin saan koman ah ngen ah ngem mapabasolko kadi wenno masuruak kadi ti riknak itan a kasla diak maako wenno maawat a diakon ay-ayaten ket wen diak la ketdi mapakawan ti pusok ti isipko no sawek a diakon ay-ayaten ni Sadiri ket diak koman a panunoten ni Cedrick ta awanen sabalin nalipatakon linipatkon lipatekon wen ta adtoy ta diak met mailibak sibabasolak itoy a mapaspasamak kadakami ken ni Sadiri siak ti gapuna ita a dikami payen agin-innuni no dadduma a pammarang la aminen a gunaymi iti mata ti sabali ket wen apay koma a diak met tagisakiten dagitoy diak maako wen kasla diak patien a maar-aramid dagitoy ta apay aya ngamin a nagrigat nagrikut ti di agbiddut wenno agbasol a mangikeddeng ket apay a kayatko wenno palubosak pay la a mapagteng dagitoy a diak la ketdin simple a maakseptar ti amin ket maawatak mamakawanak no adda a talaga diak maawatan wenno no adda a talaga basol ken nagbasol apay apay pay laeng dagitoy apay koma a diak lattan awaten a kastoy ket wen lipatek koman a maminpinsan ni Cedrick ken amin amin a pakanaiganna kaniak apay aya apay di kadi ngata ta diak la ammo diak la patien diak la awaten ket ay-ayatek pay la a talaga ni Cedrick ah ngem ah ngem ni Sadiri ti kallaysami agkallaysakami kasano kasanon diak la koman mapanunot ah nagtuok nagrigat nagrikut......

Di maiturturog ni Joyce. Ket tugottugotna a rikut agingga iti opisinada ket no kua ipilpilitna laengen nga ipasnek ti aramidna. Ngem mayag-agus latta ti panunotna. Kas iti maysa a malem a makumikom iti filing cabinet, dina mapagsusurot ket mabaybayag nga aguk-ukag.

"Joyce, aniakan sa, hoy!" inkalbit ti maysa a babai a kaopisinaanda. "Kiriring a kiriring `diay phone iti lamisaam, a! Sinungbatakon. Personal call from an old friend kano. Agur-uray."

Tinurong ni Joyce ti lamisaanna. Awan gaganaygayanna a nangpidut iti nakadata nga awditibo. Ngem kasla natalimpungaw idi maitimkanna ti immawag. Apagapaman a di nakatagari ken naimayeng. Nagtaltalangkiaw ket inkagumaanna nga inlinged ti panaglusiawna kadagiti kaopisinaanna....

Ni Cedrick! Ket saan a long distance manipud Saudi ti awag. Ni Cedrick! Nagawid ni Cedrick! Nagawid ni Cedrick! Nagawid...

Maituloyto

Menu