Kullapit: iti dakulap ti kuppit ken kuadrado a lata ti anges * kasano kadi, Apo, nga agpalpaak iti bus- sog a sennaay ti kullapit a presidente ti gra- sia iti pinggan. sangsangitak ti ilabayko nga ibit ken dung-aw dagiti kutsara ken tinidor iti lamisaan dagiti trapo a saning-i ti itanggayak a dakulap ti kaasi. iwarsik no no kua ti pag- buguan ti senador a saraaw ken sangit ti baria nga agkilli- ing iti kuppikuppit a lata ti anges. ibagam man, Apo, ti agas agas ti agbelladan a tig-ab-- no makidayaak iti padaya ti ma- lakaniang a panaas ken lisay da- giti siliasi ken siansi. kasano kadi, Apo, a kidkidak dagiti ittip nga isem dagiti polye- tos iti narpek a katawa ti tabako ti Mayo a bulbulla- gaw iti diskurso a kelleb ti bisin amian. taladuanyo man, Apo, ti kari dagiti diak madiram- osan a ngirsiit dagiti botos nga imbalud ti itanggayak a dakulap ti kuppikuppit ken kuadrado a lata ti sennaay. bendisionanyo kadi, ala, dagiti di malinay nga ikkis ken saem ken rebolusion ti isaangko a kaldero iti naudatal a kalsada ti biag.*Grand Prize iti 1997-1998 Salip iti Avant Garde A Daniw Iluko TI AUTOR: Ni Daniel L. Nisperos ket naipasngay iti San Lorenzo, San Nicolas, Ilocos Norte idi Hulio 21, 1969. Inrugina ti BS Electrical Engineering iti Mariano Marcos State University iti Batac, Ilocos Norte ngem immakar iti MMSU Institute of Technology iti Siudad ti Laoag a nagadalanna iti BS Industrial Technology. Nagpaay kas Marketing Manager sa Production/Technical Manager ti Integrated Creative Resources Institute (ICRI) kabayatan ti panagpaayna pay kas layout artist ti Kailokuan Star Weekly a publikasion ti ICRI. Agpapaay ita kas paste-up artist ti Bannawag Magazine. Adun ti naipablaakna a daniw, sarita ken salaysay nga Iluko iti nadumaduma a publikasion. Adu metten a premio ti inawatna manipud kadagiti nadumaduma a pasalip iti panagsuratan iti Literatura Iluko. Napili kas maysa a Writing Fellow iti Daniw iti 1996 University of the Philippines National Writers Workshop a naangay iti Baguio City. Baro pay. |
© 1998 Burnay E-zine |