[an error occurred while processing this directive]

  Binatog a di marsaak

(i)
sapsapulek ti bagik
kadagiti parais kasaor
nga ammusay dagiti bigat
nga umay ken simmangbay;
wenno kadagiti ranitrit
dadapilan a duayyat'
agpakada a sardam...
ngem awanak!

(ii)
nagnaak met
nasamek a siudad
kadagiti addang a panagdardaras
a nakilumbat' darikmat
dagiti binayadan nga oras
dagiti kumalay-at a bigat...
ngem awanak!

(iii)
ngem addaak latta idiay b.
kadagiti rabaw ti tambak
kadagiti agburak a rimat
ta sadiay nasarakak
rissik `toy kararuak:
   katimbeng linas panawen
ta sadiay saanton a maidasay
aweng `toy kutibeng

...ah, adtoyak
kadagiti binatog a di marsaak!





Arnold P. Jose TI AUTOR: Ni Arnold P. Jose ket naipasngay iti Brgy. Bacsil North, Siudad ti Laoag, Ilocos Norte idi Agosto 10, 1960. Inleppasna ti BS Industrial Technology iti Mariano Marcos State University iti Batac, Ilocos Norte ngem immakar iti MMSU Institute of Technology iti Siudad ti Laoag. Malaksid iti panagsurat, agduyos iti panagpinta ken martial arts: namitlo a nangyalat iti premio iti panagpinta iti naudi a tawenna iti kolehio, ken kas maysa a 1st DAN Black Belter, nagpaay nga instruktor iti Karate Siete-Pares International Karate Association, Laoag City Chapter. Madama ita nga agtrabaho iti Advertising Department ti Liwayway Publishing, Inc. (pabliser ti Bannawag). Adun ti naipablaakna a daniw, sarita ken salaysay nga Iluko iti nadumaduma a publikasion. Adu metten a premio ti naawatna manipud kadagiti nadumaduma a pasalip iti panagsuratan iti Literatura Iluko. Napili kas maysa a Writing Fellow iti Daniw iti 1997 University of the Philippines National Writers Workshop a naangay iti Baguio City. Baro pay.

© 1998 Burnay E-zine
All rights reserved

Menu