Nanang ken tatang, uray addakayon sabali a biag, agnanayon nga
addakayo ditoy panunotko. Saankayo a malipatan, ina ken ama, gapu iti gagarko idi a mangsubalit kadagiti adu a rigrigat kadakami nga annakyo, kayatko a subadan dagiti dungngoyo. Ngem anian ta dakes met ti nagtungpalanyo, nangnangruna kenka, nanang.

Ti kinasayaat ti puspusoyo, kalpasan ti pannakabangon dayta
pinaaramidko balayyo, linuktanyo dayta ridaw tapno sumbrek dagiti familia dayta kabsat a babai. Gapu ti kinaasidegyo kadagita appoyo, naragsakankayo unay ket saankayo a nagsarimadeng a nangiburay iti uray aniaman a masapulda maipapan ti panagbiag.

Kalpasan ti adu a tawen a panagrigrigatyo kadagita pito nga appoyo,
saanyo a nalasin ti pudno a panggep dayta cabsat a babai ken ti asawana. No koma indulinmo ti kuartayo idiay banko, saan koma a kasdi ti napagtengmo, ina. Idi nakitam ti panangala dagiti agassawa iti iduldulinmo a kuarta, binaybay-am latta koman. Ngem ti panangatipam isu met ti nakaigappuan ti ipapataymo...

Nanangko, pakawanennak iti saanko a pannakaumay a mangted iti
maudi a pakadak kasakbayan ti ipapanmo iti sabali, nagkaysa a biag. Naawatko ti telegrama dayta inauna a kabsatko a babai, ngem madamakami met idi nga agpatpatrulia iti taaw isu a saanak a nakaumay. Ladingitek unay, nanang, ti saanta a panagkita, ti diak man la pannakarikna iti bara ti mailiw ken mangipatpateg nga apungolmo, a segseggaak unay, a diak narikna bayat iti kaaddak iti serbisio...

Babalawek no kua dayta inauna a kabsatko a babai, ta sapay nga
inlimedna ti naaramid kenka. Kalpasan ti duapulo ket innem a tawen, sako la naammuan nga dayta kabsat a babai ken ti familiana uy-uyongan ken butbutngenda dayta inauna a kabsat, ta isu laeng ti nakaimatang ti inaramidda kenka, nanang...

Sangapulo a tawenen a tuntuntonek ti hustisia. Ngem awan pay
laeng ti gasatko. Kaaduan dagiti tattao dita lugartayo ket saanda a kayat ti mairamraman. Kangrunaanna unay, kaaduan iti partido dayta asawa dayta kabsat. Ngem uray no kasta, ina, saanak a mamingga. Kas pangarigan awan laeng ti gasatko itoy panangbirbirokko iti hustisia para kadakayo, dawatek lattan ti pammakawanmo kadakuada, nanang, ta saanda nga ammo ti inaramidda.

Nanangko ken tatangko, agpakaadak kadakayo. Awaten ken imdenganyo
`toy maudi ken naladawen nga un-unnoyko. Ammok unay nga addakayon dita lugar nga agnanayon a ragsak. Nalabit, iti saan unay a mabayag, agsasarak ken agkikitatayto amin dita a disso, ket ti Dios Apo, isunto ti mangeddeng, isunto ti mangted iti naan-anay ken nalinteg a hustisia nga intay amin sarsaraken...

TI AUTOR
Naipasngay idiay Camangaan, Vigan, Ilocos Sur idi Agosto 1922. Nagkameng iti US Navy idi 1946 ket kalpasan ti 20 a tawen a panagpaayna iti Submarine Service, nagretiro idi 1966. Nagtrabaho iti Federal Civil Service a nagretiruanna idi 1986. Kabayatan ti panagpaayna iti Civil Service, nagbasa, babaen ti GI Bill, iti University of Hawaii iti major nga accounting. Kinunana pay: "Now, I am completely retired, and and I have the urged to return to the Philippines and enjoy my twilight years there."