Ni Snoopy ket inyanak kuttongi ken walang nga inana
Iti bunton nakarugrugit ken nakabangbangsit a basura
Kaduana a rimmuar innem pay a kasinginna
A natay amin idi bay-an idan inada a nagsapa a nagmaya!
Nabati ni Snoopy, nakakutkuttong ken nakadungdungrit
Nupay nakakapkapsut ken permi a nakabasbassit
Inkarigatanna't nagsapul kanenna iti basura ken rugit
Pasaray iwisiwis nagdadakkel nga aso a nakarungiit
Agawenda pay masarakanna a tultulang ken sisiit
Agkutkutimermer lattan ni Snoopy ket buksitnan kirriit!
Ni Snoopy naminsan nga agkalkalkal basura
Dumna't McDo, nalang-abna nakabangbanglo
A sayamusom hamburger ken manok a prito
Iti karton nga awit agassawa a Mirkano
Ni Snoopy nagarapaap, ay! maramananna la koma
Uray pulpoganen dagiti artek no kua!
Ket inna insurot sungona kadagiti agassawa
Agdilpadilpat, nannanamenna nakaim-imas nga aroma
Kimmarab-as pay iti mukod lalaki a Mirkano
Ket kunanan no ikugtar daytoy iti napalalo
Ngem ti Mirkano siiisem ken ni Snoopy a nanghello
Kasta met ti Mirkana napnuan asi a nangapros ulo!
Ni Snoopy kasta unay kalawikiwna ken rag-o
Inluganda't kotse a nakasilsilap ken nakabangbanglo
Inyawidda't nakadakdakkel ken nakapimpintas unay a balay
Dinigosda, sinabon, siniampo, sinagaysay
Inikanda't kinarton ken dinelata a nagiimas a makmakan!
Ni Snoopy inampon ngarud dagiti nagsisingpet a Mirkano
Isuda't nangpanagan kenkuana iti Snoopy
Manipud kan iti aso a bida iti komiks ken tv
Isu kan kalalaingan ken kasisikatan nga aso idiay Merika
Kasla kan tao ta ammona't agsao ken agkanta ken agsala!
Ni Snoopy dimmakkel a nakanamnam-ay, nakaginggin-awa
Taraonna puro Made in USA, pati koliar ken kawarna
Sinursuruanda iti Ingles ket Ingles payen taulna
Ingles pay no ngumernger kadagiti nagdudungrit nga aso
Nga umay no kua sumirsirip iti balayda a pimmalasio
Ingles pay aneng-engna no dilpatanna't saka ken dapan
Ti apona a Mirkano a mangbilin kenkuana a mangkamat
Kadagiti nagdudugyot nga agpalpalama a mangsipsiput
Panagkinnit ni Snoopy iti paborito a prito a manok!
Ni Snoopy nagbalin nga spoiled ken nakapaspasindayag
Nupay dutdotna ket kolor-daga, siak puraw! inna ipalangguad
Nupay nakapampandek ken sungona rumbeb kas kadawyan
Nga as-aso nga inna uy-uyawen, siak Mirkano! inna iparayag
Ket paglastogna latta Ingles a taul, ngernger ken taguobna
Ikaritna pay madmadyik kano nga insuro nagbileg nga apona
No kasano a rabngisen kakolkolor ken kalanglangana
Nga as-aso, tapno ni Snoopy isu laeng ti bida.
Ngem nagbaliw ti biag ni Snoopy, ti aso a bida
Idi pinanawan agassawa a Mirkano ta nagsublidan Merika
Ta inungtan kan ida ti bulkan ti sangkailian
Nagsangit ni Snoopy iti napalalo, sumurotak inyo papanan!
Ngem kunan Mirkano, sadiay Merika bawal ti kas kenka
Isu nga agbatikan uray ta dakkelkan ken masirib ken bida!
Kasta unay leddaang ni Snoopy awanen dagiti amongna
Awanen mangted prito a manok ken hamburgerna
Ay! awanen, awanen ammona a mangbiag kenkuana
Ta naruam ni Snoopy a patartaraken lattan
Nasanay bin-ig a Made in USA a makmakan
Ket kaariekna taraon padana nga aso
Siak ni Snoopy, bidaak nga aso, kaslaak tao!
Kunkunana ngamin idi, isu kan pay ket Mirkano!
Ket ni Snoopy kapilitan manen a nagsukain
Kadagiti basura ken rugit iti inna kanen
Nakadungdungrit ken nakabangbangsit manen
Nakakutkuttong ken nakaam-ampas payen
Innan ibabain Inglesna nga inna impalpalangguad
Innak kaam-amak as-aso nga inna idi inang-angat
Innan ibabaag ipusna no abangen inna idi kinamkamat
Ay! di met agkurrin madmadyik a nasurona kas armas!
Ket ni Snoopy, ti bida nga aso, ay, kaasi met!
Ta sinilo dagiti adik ken mammartek
Ket inda pinulpogan, kinaldereta, kinilawen!
Ay, piman awan naaramidan alang-angna uray Ingles
Uray pay impakaasina nga isu ket bida ken masirib
Ay, uray pay inyararawna nga isu ket saan nga aso
No di ket tao, saan a basta tao, maysa a Mirkano!
