ti ar-aria biagenna ditoy ti bendision
dagiti mansa, binilang nga addang-pamumpon
ken tata-ubing, naisurat iti tapok-rabii
dayas-basit' panagwaksi iti ilelennek
balabalan sasainnek, kapanagan dagiti
tartaraudi a burburtia:
linteg-isip, linteg-riro, linteg-subli
iti paratong laud a sadiay a kaatag
ni ubing-ubing, kaasmang ti arem-mata,
sandit' panagitulod iti panungpalan
immun-una nga ar-aria dagiti di-matay
a regget a biniag ipupusay nagkauna nga anges
agbannikes kaniak ti raquiza hill, pantok
iti daya ken riruennak ti karayan-laoag
iti malem:
saanen a paco roman ti dagusko
wenno santa maria wenno darayday
inawennak ti panagsikog
dagiti karkama ket makaturogak
binayadan nga idda
iti binayadan nga oras
tuding dagiti panglakayen kaniak:
diak a kaputed ti lagip!
dinak kaingas ti darepdep!
saanak a kasingin ti derrep!
unorek a lallayan dagiti ubbing
tapno iti isem baliksenda kaniak
a kaputednak ti lagip
a kaingasnak ti darepdep
a kasinginnak ti derrep
lamuten ti dawel-tsina dagiti lallay
ket arakupennak ti birrit' bengkag:
sakaek ti nakemko iti tikag dagiti aldaw
iti sandi dagiti pasalat' darayday
iti likud dagiti kinnikinnit' quiapo ken ermita
tapno maukag dagiti bendision iti
kampay-idi dagiti lantip-padaya
ditoy nga agruting dagiti derrep
tumrarongda a plumat' patibong, panagasad
panagarikenken iti keddel-buneng
iti ut-ot bua ken gawed
lasinek no kuat' arban-makiudong
maki-bargain sale iti kamino real
ngem yaw-awandak dagiti ungor-katedral
ken naibulsa a panaggangganat agingga't gabu
a sadiay nga aglibasak kadagiti karit
puyupoyan-la paz tapno ulilaennak dagiti kalman
