ART TOLENTINO IGNACIO

Art Tolentino Ignacio Sigud a taga-Dingras, Ilocos Norte sakbay a nagpa-Hawaii idi 1983. Maysa a kameng iti buyot ti Estados Unidos (Army) manipud Disiembre 1984 agingga iti agdama. Bayat ti kaaddana iti buyot, adun a lugar ti nakaisadsadsadanna saan laeng nga iti kontinente ti North America no di pay ket kadagiti kontinente ti Europa, Asia, South America ken Africa. Adu metten a medalia ken pammadayaw (peace and wartime medals, ribbons and certificates) ti naipapaay kenkuana saan laeng a manipud iti militar ngem kadagiti pay nadumaduma a gunglo a sibiko iti Hawaii, Oklahoma, Colorado ken Germany. Nagturpos iti Airborne Master Jumper, Advance Ranger, Explosives Disposal/Ammunition Expert, Communications (Sincgars) Equipment Scrambler, Air Assault, Drill Sergeant, Recruiter, Combat Life Saver, Equal Oppornunity, Armor School, Artillery, Small Arms ken dadduma pay a military schooling nga intuyang ti US Army. Pito a bulanna iti Gulf War ken dua a bulanna idiay Somalia ken tallo a bulanna idiay Haiti babaen iti Humanitarian Mission. Agdama a destino iti Schofield Barracks, Hawaii.

Nakaipablaak metten iti sumagmamano a sarita ken salaysay iti Bannawag. Nagun-odna ti Umuna a Gunggona babaen ti saritana a "Sangapirit a Langit Iti Dakulap Dagiti Sangaribu nga Impierno" iti salip iti sarita nga inesponsoran ti Upland Municipalities of Ilocos Sur of America (UMISA) idi 1997. Madama nga ipabpablaak ti Bannawag ti nobelana a "Sangarakem a Bituen," pakasaritaan ti maysa nga Ilokano a US Army kadagiti adventuresna iti gubatan, iti man militaria wenno iti lubong ni ayat. Panggepna met ti mangtaked iti bukodna a web pages iti Internet iti masakbayan a pakabirokanto kadagiti sinuratna (Iluko, Taglish--naipablaaken ken saan) babaen ti titulo a KAMPILAN. Nabileg ti arapaapna a makailibro kadagiti gapuananna iti panagsuratan iti asideg a masakbayan.

Kameng ti GUMIL Oahu ken ti umuna ken ti naisupsupadi a gunglo dagiti agngayangay, gagangay a mannurat, mannuraten wenno premiadon a mannurat iti Oahu Hawaii, ti Puuku Mauka Literary Crown Troupe a binuangay ti RiGla Literary Comments/Review, Inc. iti Honolulu, Hawaii.