NASAYAAT LA UNAY unay daytoy napanunotyo a gannuat a mangbuangay iti maysa a pagiwarnak Iloko babaen ti kabaruanan a sirib iti Internet wenno cyberspace.

Kadagiti immuna a tawen iti SCF (soc.culture.filipino newsgroup), ket adda met ranta idi a mangbuangay ti maysa a mailing list dagiti padatayo nga Ilokano, ngem kasla agsimbron dagiti dadduma ket kinunada: (iyulog ko iti Iluko) "Mas man pay ta sumagmamano tayo laeng ditoy SCF, sayo pay ket bingayenen. Apay aya nga sumina kayo nga Ilokano?"

Saan a natuloy daydi a plano. Sapay koma ta matuloy itan. Aglalo ket nakuriro la unay diay SCF kadagiti naglabas a bulan. Pimmanaw pay dagidi dadduma a nagaget nga agipaskel idiayen.

No awan pay nagan daytoy (proposed) nga e-zine, mabalin met nga awagan tayo iti SALUYOT `tay nasustansya ken paboritotayo a nateng. Ania ti makunayo? No sino ti mapili nga editor ket no mabalin, saan koma unay nga istrikto iti ispeling ken grammar. Wenno sukatanna lattan iti rumbeng nga sao. Saan nga mailaksid a kaaduan kadatayo ket di met pormal a nagadal ti pagsasaotayo, wenno nabayagen a di nag-surat iti Ilokano.

No mabalin ket awisentayo koma amin nga interesado ti kultura Iloko a makikappon, agraman amin a G.I (Gin-Wine: Ilokano, Itneg/Isneg, Igorot, Ibanag, Ilongot, Itawis, ken dadduma pay).

Ti koma kangrunaan a ranta daytoy a grupo ket isu `tay kunayo a panagkakaddua/panag-gagayyem, ken pang-sisinnakit dagiti Ilokano ditoy lubong iti Internet.

Sapay koma ta agballaigi ti panakabuangay daytoy a grupo. Namnamaenyo iti suportak ti daytoy a gannuat.

Agbiag ni Ilokano!

Okey ngarud!

DANTE AMORES
-- maysa nga saluyot ti Sydney, Australia

ps_amores@coco.cchs.su.edu.au
College Production Services, The University of Sydney - CCHS
East Street, Lidcombe, NSW 2141, Australia

MAIKADUA A SURAT

Nakitak iti e-zine a "BURNAY" ket napintas la unay. Nasayaat a pagikabilan dagiti nalaing ken agdadamo a mannurat nga Ilokano. Sapay koma ta adunto iti agipatulod kadagiti sinuratda iti asideng a masangnguanan. Nasinged la unay daytoy a burnay kaniak ta ngamin ket dimmakelak idiay Pagburnayan, Vigan, Ilocos Sur.

Adda met ket nasuratkon, ngem saan nga iti nakayanakantayo a pagsasao no di ket iti Ingles. Padasek to ket nga iyulog iti Iluko ti sumagmamano kadagitoy.

Inyawis ko pay iti sumagmamano a gagayyem nga Ilokano iti panagbasa ken panagipatulnod iti e-zine a BURNAY.

Agbiag ni Ilokano!

Kablaaw manipud ditoy Sydney,
Dante