Kas pakauna, kunana, iti planggana a dinanumanna,
Ginelgegelgelna dagiti puraw nupay dina pay sinabonan;
Iti naggelgelanna, intanebna dagiti dekolor:
Imbabasana laeng, dina ginelgel kas kadagiti puraw;
Idi agsabon, inyudina dagiti dekolor
Nga inggabsuonna iti nanumo a planggana;
Kunana: di mabalin a paggiddanen a labaan
Iti maymaysa a planggana ti puraw ken dekolor
Ta dadaelen, alian ti dekolor ti puraw.

Sipapasnek a ginelgelna dagiti puraw, pinennekna't sabon,
Binisbistradna a minirmira a siaannad
Tapno awan kano ti malibtawanna a rugit;
Nagusar pay iti kloroks tapno masigurado kano
A maikkat ti dina makita a rugit wenno mantsa
Ket agtalinaed ti natayengteng a kinapurawda
No nakaro koma bassit ti rugit dagiti puraw,
Idi kano pay la koma rabii nga inyuperna
Iti powder soap nga espesialista iti rugit,
Sana koma ikulada ita iti karuotan a naap-apan iti nadalus.).

Nayasugna ti kinarigat a labaan ti puraw:
Urayna la ukisan dagiti ima
Di met ngarud mabalin nga itantan nga ilaba
Ta no agbayag tumangken ti rugitna
(Narigrigatton a labaan) Tarumatimen no ipasuli
Nga adda basbasana (ad-addanton a pagproblemaan)
Saan a kas iti dekolor, a gapu ta narigat nga aglinasin
ti rugitna, nalaka la a labaan: uray sinankuansit la a gelgel,
mayaten, saan a kas iti dekolor nga uray agbayag
a sibabasa iti suli ti la angotna ti problema.

Idi maipinalna a magawgawan dagiti dekolor
Iti nangigawgawanna kadagiti puraw
(Baliktadenna tunggal magawgawanna),
Pinanunasanna a nalaing dagiti hanger
A nakaisalapayan dagiti puraw
Idinto a dina man la kinita no nadalus
Ti pagbalaybayan a pakaibilagan dagiti dekolor
(Adda pay basta insalapayna lattan iti alad).

Idi la a maduktalak ti kinadaksanggasat
Ti dekolor a suotko iti paglabaan;
Ket rinupangetak ti nasaem a kinapudno:
Iti uray ania la ketdi, puraw latta ti maipangruna!