|
Agikur-itak manen iti daniw Ni kinaagmaymaysa ita. Kaatagko Dagiti lagip dagiti magatang a kanito Iti baet dagiti pangngadua. Ay, Agsiripsirip dagiti burburtia ni ayat Iti iking ti di met agit-it nga idda. Palabsek no kua ti banang-es, idulinko Iti angdod ti pungan a saksi Ti buridek itan a leddaang. Lukaisak ti barukong iti apros Ti rabii nga an-andingayen silnag Iti ubing pay laeng nga agpatnag. Agidulinak iti kari iti saklot ti sipnget Nga oras ti panagikur-it, panangkamat Kadagiti tartaraudi a ladingit. Iti espasio ti blangko nga isip, Paganninawek dagiti darikmat, Pagandapek dagiti mapuyatan a ragsak, Aguray iti limos nga ayat, Bara ti apros dagiti mabilang nga oras. Suratek no kua dagiti balo a leddaang, Di naasmangan a paulo dagiti maibus A kaltaang. Iti daniw nga urayek Ti kari ti rabii, panagsublinto latta Iti idda ti mabuniagan a panagumbi.
|